mardi, 20 octobre 2020 14:29

He mata he mata : Tūako ? Tūàko ?

 

A) - Tūako èo ènana ; Tūàro èo tahiti :


1) - Èo ènana : Tūako
(Haè tuhuka èo ènana)

*- Tū : i òto o te tau keu, e mai te tau ènana no te ako.

*- Àko : me he haaūpahi, me he haatūpapahi (affronter ; s’affronter).

*- E tū io he tohua no te ako atu te hoa i te hoa.


2) - Reo tahiti : Tūàro
(Fare Vāna’a)

*- Tū : e maô.

*- Aro : e hee i te tōua, e tōua, e nahu i te tōua.

Te aka o tēnei mou ponatekao : « ako » ma he èo ènana, « àro » ma he èo tahiti, mea kē to âua tumu.


B) - Te huìkēìa o te reta :

A haamaakau tātou i te hakatu o tēnei mou èo :

*- Io he Moana nui ahau : ua huì te « L » io he « r ».

*- Ma he èo ènana, mea nui te reta « r » ua kaò/naò.

*- Ma he èo tahiti, te « k » me te « g », ua kaò/naò paotū.


C) - Te nuina hakatu haaviviniìa no te ponatekao e tahi :


1) - I òto o to tātou èo, e vai nei te mou ponatekao mea nui te haaviviniìa :

        *- Kāòha :

  • Ia àvei òe me te ènana : « Kāòha òe ! »
  • Ia aukuha òe i tītahi ènana : « E kāòha nei au i to ù motua, u mate.»
  • E tuku i te vaetukia : e tuku i te kāòha.

       *- Ùa :

  • Ùa : E vai nei e ùa ènana.
  • Ùa : E keì i te ùa.
  • Ùa : U kāèpuèpu tu ù kōpū, ua ùa au.


2) - Te aka no te ponatekao « ako » io he Moana nui ahau :

      a) - Ma he èo ènana : te nuina hakatu haaviviniìa no tēnei ponatekao « ako » :

  • Haaūpahi / haaū : e ako i te hapai i te mea toko, e ako i te tōua…
  • Hakako : e ako i te tekao.
  • E ako i te mea e kai, e aha mea mōmona.

       >>> Ako : haaūpahi / haaū : e ako i te hapai te mea toko ; e ako i te tōua…

     b) - Èo tahiti :

  • U haakoèìa te « k », i koàna mai ai te tūkina èo io he « o » : «  » >>>  hakako : e ako i te tekao, e haavivini.

    c) - Io he Moana nui ahau, te aka no tēnei ponatekao èo tahiti « àro », me i òto mai o te ponatekao : « kalo » ma he èo tumu kākiu o te Moana nui ahau.

  • Èo tahiti : u takiìa te « k », i koàna mai ai te tūkina èo io he « a » : « àro » : e hee i te tōua, e tōua, e nahu i te tōua.
  • Èo ènana : u takiìa te « L/r », i koàna mai ai te tūkina èo io he « o » : « e kaò ». Ia kere anaè òe, e kaò òe i te ìma. Te ponatekao « kaò » ma he èo ènana, e « àpe » ma he èo tahiti.


3) - Te ponatekao èo ènana « kaò »,
me i òto mai o « Kalo » : « Umoì òe e pauèka te ìma akoè à e kaò òe i tītahi ènana ». E peàu nā motu e ono : « kaò ».

Umoì e kāvohi me tītahi ponatekao a tātou e hani nei : « kaò (Up, Nh) / naò (Uh, motu i ùka) : moèhu » no te mea te aka o tēnei ponatekao kaò/naò, me io he Moana nui ahau « Galo », e moèhu. E peàu te Tahiti : « àro : memau kekehu ; hana nui ia vivini ; moèhu ».


4) - Atika à, te « àpe » ma he èo Tahiti,
me i òto o te aka o te ponatekao o te Moana nui ahau : « kape ». Ma he èo ènana, te kape, e toa e ako i te tōua.

 

No te aha aê hei tēnei ponatekao tūàko >>> tū-àko ?

No te mea te « àko », e pooâkau mea ukui i te vaka. E peàu te tau poì me i ùka me Ua Huna : e « àno ».

Tēnei ponatekao «àko/ àno » ma he èo ènana, me i òto mai o te ponatekao « Lago » ma he èo tumu kākiuo te Moana nui ahau. E pooâkau.

Me i îâ mai te pūàko/pūàno, te « ruà » hoì ma he èo tahiti.


E aha te piò tātou e peàu ai tūàko i tēnei ?

No te mea u mohani tātou i te òko i te ponatekao « tūàro » ma he puhoata, ma he puhohaamevaha èo tahiti.


A haahei tātou i tēnei ; a peàu tātou « TŪAKO » : e tū mea ako, mea haaū me te ènanaūpahi akoè à te pūpū ènanaūpahi.


© Te Haè tuhuka èo ènana - Académie marquisienne – Oaoamanu/octobre 2020

 

Propulsé par CComment

Èo ènana

Langue marquisienne

Joomla Template by ThemeXpert