HAÈ TUHUKA ÈO ÈNANA

PUTUÌA NUI I TAIOHAE

ME I TE 22 TIHE I TE 26 NO TŪHUA 2025

Ua putu te tau mautoko o te Haè Tuhuka èo ènana i TAIOHAE me i te 22 tihe i te 26 no Tūhua. U tīmata te putuìa i te 22 no Tūhua ma hope o te kaiìa mau i te hora e ùa i te oatea ahiahi. Na te Upoko hakatee, Toti TEIKIEHUUPOKO, i pepeù i te putuìa ma te apuu i te tau mautoko i kātahi mai.

• No te tuiìa o te Haè Tuhuka èo me te Piika Motu Haka

E hīa nei Toti TEIKIEHUUPOKO, Upoko hakatee o te Haè Tuhuka èo me te Piika Motu Haka, e hakavivini i tūìa o te Motu Haka i te Henua Ènana nei.  

• No te tūìa o Teautaipi TEIKITEKAHIOHO

E tū atu Teautaipi io te kōava o Maxime HAUATA io te Pū CESEC i Tahiti no te ava e ha èhua a tihe mai. Na īa e vae atu te tau pāòtohana o tēia pū i èià e tomo atu ai.

• No te niuaèo a te Haè Tuhuka Èo Ènana

E 4962 ènana mauhani me i te tīmataìa. E 68 ènana mauhani hou me i te putuìa i UA HUNA.Te nuiìa o te ènana mauhani, e noho nei âtou i TAHITI. E 54890 ènana e vii nei io te tohua niutavavā me i te tīmataìa, 2068 ènana hou me i te putuìa i UA HUKA, 40 ènana e vii nei paotū te â.

• No te tau ponatekao tāpapaìa me te tutoiti o te kāputuèo

I te ava nei, ua hakaēa te hana i ùka o te tutoiti o te kāputuèo i tīmataìa i te èhua 2020.  E taki mai Sylvain GUCHER i te nuina ponatekao no te kokomo atu i òto o te ponatekao tāpapaìa. No te tutoiti « IAÈO », 5679 pona èo ènana, 4910 pona èo farani, 3890 pona èo peketane i kokomoìa atu.

• No te tau putuìa i te tau pō a toù i TAIOHAE

E putu ananu nei te tau mautoko e hā o NUKU HIVA i TAIOHAE paotū te pō e toù. Mea neke meitaì te hana. Atii, e neke ananu nei te hana hakamevahaìa a Teautaipi ma òto o te Pū « Te Òkonui ».

• No te hana kātahi me te Pū hana a te Hau henua

E neke ananu nei te hana kātahi me te pūhana a te Hau Henua. Ua pao te nuina o tau ponatekao me io te pūhana a te Hau Henua i te hakaèoìa. U tuku mai te poì hana o tēia pū 60 avetekao ta âtou i hakaèoènana. Ua pao 40 avetekao i te hakatoitoiìa a te tau tuhuka èo.

• No te koutee o Toti me te tau hakaìki i Nice no te UNOC3

U tapatapa mai Toti i te tau hana i hapaiìa i te putuìa nui o te tau henua o te aomāàma i Nice no te tumu tekao o te pāpuaìa i te Tainui ahau.

• No te kōtūòmia « Kaakū » me « Conversation canaque »

Ua pao èka te hana me tēnei mau kōtūòmia ; ua hakaheeìa io Guy WALLART no te òomi. E tiakiìa nei te tekao hou me io īa.

• No te haatoitoiìa i te haaèoìa me te patuhei o te Pipiria

Paotū te po e toù e hana kātahi nei te tau mautoko e ha o NUKU HIVA me Joseph HONG, e tuhuka no te tau èo kākiu (hepereo, hereni) e tahi hora te òa no te haatoitoi me te patuhei o te Pipiria ma he èo ènana. E hana taetae oko tēnei no te èo.

• No « EHU te kaiū ihovare »

Ua tukuìa te âkakai « EHU te kaiū ihovare » i te upoko hakatee o te pū hakakoìa tamahēhē o UA HUNA. Na âtou e patu mai i te ata no te hakaàva hakaùa i hua âkakai. E hīa nei te Haè tuhuka èo ia òomiìa te kōtūòmia o EHU ma mua o te Matavaa o UA HUNA. Mēìa te nui o te hana a te tau tamahēhē me te toko o tēnei tumu hana na âtou, e maakauìa nei e tuku i tēnei hana i tītahi tuhuka patu ata. Ua vavaòìa te upoko hakatee o te pū hakakoìa tamahēhē o UA HUNA no tēia tukuìa maakau. U haatiàtohu mai īa i te mea aê âtou i tīmata i te hana.

• No te tutoiti « IAÈO »

U tatau kātahi te tau mautoko i te tau hātika tekao i patuìa e Sylvain GUCHER mea uu atu i òto o te tutoiti. U hakatoitoi kātahi âtou i te tau tekao i patuìa.

• No te òomiìa i te ponatekao tapapaìa

Ua hakaheeìa te tekao i te mau pu òomi kōtūòmia e ùa STP Multripresse me API Éditions ia haatiàtohu mai âua i te nino moni e utuìa atu no te òomi 250 kōtūòmia 500 tapahāmani me te hakaheeìa ma he ihepe. Ua hakapao te tau mautoko e ape i te moni pātoko i te pū hakatee o te haatumu no te òomi i te tau kōtūòmia no tēnei ava a tihe mai.

• No te patu hāmani e tu mai io he kōava o Meana

U hakamevaha te Haè Tuhuka èo i te tekao ùmihiìa i tītahi patu hāmani hou no te tū mai io he kōava o Meana ma he niuaèo. Ua haahee mai e 6 vehine, e 2 māhaì i ta âtou apeìa.

• Ponatekao tāpapaìa

Ua pao 1413 ponatekao i te hakaèo me te hakatoitoi. E hakauuìa âtou i òto o te kōtūòmia me te tutoiti o te ponatekao tapapaìa.