Mēìa i te hananui no te haakoàna mai i te tīketi àkiona, ua tihe to mua i Ua Huna Félicienne Heitaa, Antoinette Duchek me Sarah Vaki i te pō 13 no Oaoamanu. Ua tīmata âtou tootoù i te hana i ùka o nā tumu tekao e ùa :

• Te apeìa a te Pū TNTV ia haaèoìa te tau tekao hakakite i te hakatu o te àki.
• Te âkakai o « Ehu, te kaiū toa ihovare o Ua Huna ».

Ua tatau te tau mautoko tootoù i te tau avetekao me io te Pū TNTV i pao atu i te haaèoìa atii i te âkakai o Ehu i patuìa e Elvina Titinaei Farone. Ua haahei me te haatoitoi âtou i tītahi tau ponatekao. Ia tihe mai te tau mautoko o Nuku Hiva me Ua Pou, a tahi a haatoitoi kātahi.

Ua tihe mai tītahi tau mautoko i te pō 15 no Oaoamanu. Ua apuuìa te tau mautoko paotū e te hakaìki o Ua Huna i vaièi mai i tītahi pāòto no ta âtou putuìa. Ua tīmata te putuìa i te pō 15 no Oaoamanu ma hope o te kaikai oatea i te hora e ùa. O Tumuehitu Julien te i vaeìa no te aahi i te putuìa, o Félicienne te patu hāmani

• No te âkakai o « Ehu, te kaiū toa ihovare no Ua Huna »

Ua tatau kātahi te tau mautoko i te âkakai o Ehu. Ua poeka te hana. E hakaheeìa tēnei âkakai io te vivini o te pū hakakoìa tama hēhē o Hane, na âtou e patuata.

• No te niuaèo a te Haè Tuhuka Èo Ènana

     E 41425 ènana e vii nei io te tohua niutavavā me i te tīmataìa ; 2077 ènana hou me i te putuìa i       Vaitahu.

     E 4593 ènana mauhani me i te tīmataìa ; 52 ènana mauhani hou me i te putuìa i Vaitahu. O te tau haakakai, te tau vāhīhana o te putuìa o te tau pō e toù me te tau tekao i takiìa mai me io kōtūòmia « Papaìaèo ìkihei » te i tatau nui ìa e te tau ènana mauhani.

   No te tau « stories », ua kiteìa te iti o te ènana e tiòhi nei. Ua haapao te tau mautoko e hakaēa te hakamevaha ma hua tau « stories ». E ùmihi âtou i tītahi vaanui kē atu.

• No te tau putuìa i te tau pō e toù i Taiohae

E putu ananu nei te tau mautoko e hā o Nuku Hiva i Taiohae paotū te pō e toù. Mea neke meitaì te hana. Atii, mea neke meitaì te hana hakamevahaìa a Teautaipi ma òto o te Pū « Te Òkonui ». Ma òto o te tēnei tau putuìa paotū i te pō e toù, e kiteìa nei te hana a te Haè Tuhuka èo.

• No te hana kātahi me te Pūhana a te Hau henua

E kātahi te tau mautoko e hā o Nuku Hiva me te tau poì hana a te Pūhana a te Hau henua ma te pō e ìma paoìa o te meàma. E neke ananu nei tēia hana. I tēnei ava putuìa i Ua Huna, ua haatoitoi te tau mautoko 408 ponatekao. E hakahuaìa atu io te Komanā Hau henua.

• No te kōtūòmia « Kaakū » me « Conversations canaques »

Ua haapoekaìa te hana i te ava putuìa i Vaitahu, ua haaheeìa io Guy Wallart, te ènana na īa e òomi.  Ua haatiàtohu mai īa i te mea ua tihe io īa tēnei mau kōtūòmia. E hakapao īa i ta īa amoka hana ia hua mai īa me io te ava hakaēaìa.

• No te haahuìkēìa i te pahiaahi a te Haè tuhuka èo ènana

Ua haaheeìa io te pū hana a te haatee hau henua tēnei tumu hana i haapoekaìa i te ava putuìa i Vaitahu. Aê tahi haahuaìa mai me io te haatee hau.

• Te tumuhana i apeìa mai e te Motua Èpikopo

Ua hakatihe mai te Motua Èpikopo Pascal i tītahi tapatekao ta īa i patu e ìò e tekao òmua ìka no te kōtūòmia « Te Tekao a te Etua » e òomiìa i te ava a tihe mai. Ua tatau kātahi te tau mautoko i hua tekao, ua haaèoènanaìa me te hakahee atu io te Èpikopo.

• Te tau atavii a te tau tama hēhē o Atuona

Ua tiòhi hakaùa te tau mautoko i te tau atavii a te tau tama hēhē o Atuona. Ua poeka te hana. Mou â i toe, e haamevaha atu te Haè tuhuka èo ènana i tēnei tau ata i ùka o ta īa tohua niutavavā me ta īa tapa niuaèo Facebook. Ua apeìa to mua te haatià o te vehine hakatee i te pū hakakoìa tama hēhē o Atuona.

• No te putuìa i Fatu Iva i haaheiìa no te ava Mei.

U hakapao te tau mautoko e haaneke i tēia putuìa i te ava Nāpeka o te èhua 2025. Atika à, no te putuìa nui i Taiohae, e avaiìa no te paoìa o Ūaòa i te ava hakaēaìa hāmani etià e tihe mai te tau mautoko paotū.

• No te haapeipeiìa i te Koìka Matavaa e haììa i Ua Huna

U kātahi mai Ranka Aunoa, upoko haatee o te COMOTHE o Ua Huna no te hakaàvaìa maakau i ùka o te Koìka Matavaa e hapaiìa ma te tū Mei o te èhua 2025.  U tuku mai īa i to īa maakau i ùka o te taetae o te èo he tūàka o te haatumu ènana. U hakamevaha mai īa i te tumu tekao ta âtou i vae.

U ape mai īa i te tau mautoko ia hatu mai âtou i tītahi tapatapa, e ìò he tekao òmua ìka no te hakamevahaìa i te Matavaa o Ua Huna. Ua pao i te tau mautoko i te hatu i tītahi tapatapa me te hakahee atu io Ranka. Na īa e haahua mai i to īa maakau.

• Apuuìa a te pūhana putuìa mataèinaa

U kātahi atu te tau mautoko me te tau hakatoo mataèinaa o Ua Huna i te tīmataìa o ta âtou putuìa. Ua apuu haapakaihi te hakaìki me te hakaūo ia âtou i òto o te tau amoka hana no te èo ènana.

• No te tau ponatekao tāpapaìa

Ua haatoitoi kātahi te tau mautoko i tītahi tau ponatekao i haaèoìa a koè à i pēpenaìa i te tau ava putuìa i pao.

*- 260 ponatekao a te Haè tuhuka èo ènana

*- 408 ponatekao a te Pūhana a te hau henua

Ua pao ònaòna te hana i te pō 19 no Oaoamanu i te hora 5 me te hope i te ahiahi.