HAÈ TUHUKA ÈO ÈNANA - PUTUÌA I ATUONA, HIVA OA, ME I TE 17 TIHE I TE 21 NO ÂVEA

Ua putu te tau mautoko o te Haè Tuhuka èo ènana i Atuona me i te 17 tihe i te 21 no Âvea.

Ua tihe mai te tau mautoko o Nuku Hiva me Ua Pou i Atuona i te âtapu 16.

U tīmata te putuìa i te 17 no Âvea i te hora e 8 io te Pū hana a te Hau Henua i Atuona.

• Te koìka a te Haè Tuhuka Èo Ènana
  
  

I te 17 no Âvea

U haatiàtohu me te haapoeka te tau mautoko, pātokoìa e Mani Touatekina me Nui Teikiteepupuni, i te papatuhituhi no te koìka o te Haè Tuhuka Èo Ènana e haììa i te 18 no Âvea.

U haapeipei te tau mautoko i te tau haìna me te tau hana o te tau pāòto tikitahi.

I te 18 no Âvea

Ua haì te tau mautoko i te koìka o te 25 èhua o te hakatūìa i te Pū Tuhuka èo vāàna e te papatuhituhi nei.

Hora 08 : Pepeùìa

• Pure, hīmene apuu
• Tekao apuu a te Upoko hakatee
• Tekao a te mautoko tikitahi
• Tekao a te hakaìki
• Tekao a te mataàama Titiehu Heitaa
• Tekao a te Motua kuhane Émile Buchin

Hora 8 me te hope tihe i te 11 me te hope

Viiìa ma he tau pāòto hana no te tau tōìki hāmani o te tuaùa me te nuina ènana e tihe mai

Hora 13 tihe i te hora 15

• Viiìa ma he tau pāòto hana no te tau tōìki hāmani no te tuatahi, pāòto CE me C
• Te tau pāòto hana
• Hakakiteìa me te hokoìa i te tau kōtūòmia a te Pū Tuhuka Èo Ènana (Ruto + Edouard)
• Tutoiti IAÈO, Niuaèo Facebook, Tohua niutavavā a te Pū Tuhuka Èo Ènana (Iakopo, Toti)
• Âkakai o te hakatūìa i te Haè Tuhuka Èo Ènana (Toti + Iakopo)
• Te patuhei (Âtua)
• Pēpenaìa ponatekao (Teautaipi + Elvina)
• Keuìa me te takièka (Léonne + Félicienne)
• Hanaìma : ùmuhei + èitā (Sarah + Mano)

Na Mani Touatekina e hakaūo me te hakavii i te tau tōìki me te tau poì e tihe mai.

Ua koakoa nui te tau mautoko i te âveiìa me te hakaàvaìa me tau tōìki i òaìa te â.

I te 19 no Âvea

• Te haììa i te koìka o te Haè Tuhuka Èo Ènana

Ua tuku te tau mautoko i to âtou maakau i ùka o te koìka i haììa no te 25 o te èhua o te Haè Tuhuka. Te maakau kātahi, ua mōkai te hana, taetae nui te hakaàvaìa me te tau tama i titihe mai. Ua kiteìa to âtou pakaihi me te apuu i te tau tekao i hakaàvaìa atu me âtou.

U hakameitaììa te Hakaki me to īa tau ìmatoko atii Mani Touatekina no to īa pātokoìa mai i te hana a te tau tuhuka.

Te maakau, ia hakaheiìa tītahi âveiìa me te tau tōìki hāmani io tēia motu io tēia motu i te ava putuìa o te tau tuhuka èo.

• No te kouteeìa o Toti i Papeete

U vetevete mai Toti i te tau tumu hana ta īa i hakapao atu i to īa kouteeìa i Tahiti me i te 13 tihe i te 19 no Oaoamanu.

• Ua kātahi atu īa me te tau mataàama no tītahi hakaàvaìa maakau i ùka o te hakakoìa i te tau tama ma òto o nā èo e ùa : te èo farani me te èo ènana.
• I te 19 no Oaoamanu, ua tupu tītahi putuìa me te pū CTC. U àamaìa te vāhīìa hana moni a te Haè Tuhuka èo. Aê he kōhii i kiteìa.
• I te 20 no Oaoamanu, u âvei īa me tītahi tau pāhoè ènana o te piika e haapei nei i te vaeìa pootu o te Henua Ènana. No te mea hoì ua pāpuaìa te ikoa « Miss Marquises », aè koàna hakaùa i te hakahana ia īa. Ua tuku atu TotI i te ikoa e hei, oia hoì te « Pootu nui a Hau ».
• Aè īa i âvei me te Upoko haatee o te hau henua, me he mea i hakaheiìa no te tekao i ùka o te haahuìkēìa i te papature aahi i te Haè Tuhuka èo.
• No te apeìa i te moni pātoko no te òomi te kōtūòmia, ia hakapaoìa tēia i te tīmataìa o te èhua.
  
  

• No te hakamauìa ia Jacob Otto io te kōava hana patu hāmani o Haè Tuhuka Èo

Ua tū te maakau o te tau mautoko no te hakamau ia Jacob Otto e patu hāmani io he kōava o Edouard. E tīmata īa ma te pō 1 o Èhua 2026.

• No te tūìa o Teautaipi Teikitekahioho

Ua tiàtohu e tū atu Teautaipi io he kōava o Maxime Hauata, tuhuka o te Kāruru Vananga io te Pū CESEC. Na Teautaipi e tū atu i òto o te tau pāòto hana i haaheiìa.

• No te niuaèo a te Haè Tuhuka Èo Ènana

No te niuaèo Facebook,

I te 19 no Âvea, tatauìa 62 931 ènana e vii nei, e 4477 ènana hou me i te 8 no Māhinaihea (putuìa i Ua Pou).

Te tau tumu hana nui te ènana i tatau :

• Te tau haakakai
• Te putuìa o te tau mautoko o Nuku Hiva ma te pō e toù
• Te papaìatekao
• Te patuhei

Te tohua niutavavā

I te 19 no Âvea, tatauìa 62 909 ènana e vii nei, 4477 ènana hou me i te putuìa i Ua Pou.

• No te tau putuìa i te tau pō e toù i Taiohae

E putu ananu nei te tau mautoko e ha o Nuku Hiva i Taiohae paotū te pō e toù. E hakarere âtou i te keèepoho o ta âtou vāhīìa hana i tau tuhuka paotū.

Atii, e neke ananu nei te hana hakamevahaìa a Teautaipi ma òto o te Pū « Te Òkonui ».

• No te haatoitoiìa i te haaèoìa me te patuhei o te Pipiria

E hana ananu nei te tau mautoko e hā o Nuku Hiva i te pō e toù no te haatoitoi i te haaèoìa me te patuhei o te Pipiria ma he èo ènana. Tōtahi atu, me tītahi tau hana kē atu a te Èpikopo e hakatihe nei io âtou.

• No te kōtūòmia « Kaakū » me « Conversation canaque »

Ua hakatiàtohu mai Guy Wallart ua pao ia īa i te hakapoeka i tēnei mau kōtūòmia, u hakaheeìa e īa io te pū òomiìa i te henua Kina. E tiakiìa nei ia tihe mai tēnei mau kōtūòmia.

• No te hana kātahi me te Pū hana a te Hau henua

Ua pao te tumu hana to mua me te pū hana a te Hau Henua :

650 ponatekao i hakaèoìa

60 avetekao i hakaèoìa, aî hakatoitoiìa atu nei.

• No « Ehu, te kaiū ihovare »

Ua pao « Ehu, te kaiū ihovare » i te òomiìa, u tīmataìa te hoko. Atika à, ua kiteìa tītahi kaiū teka e koàka ia haatoitoi. E hīaìa nei e hakaèo peketaneìa tēnei âkakai o EHU ia òomiìa hakaùa.

• No te tutoiti « IAÈO »

U tukuìa te tutoiti IAÈO ia Sylvain Gucher, ua pei no te hakauu atu i òto o Play Store me Apple Store. E poeka te hana ma mua o te koìka Matavaa.

• No te ponatekao tapapaìa Tuhipona

Ua pao i te òomiìa. Nui te i hokoìa i tēnei ava putuìa i Hiva Oa.

• No te matahetū Mataìki patuìa e Toti

U tatau hakaùa te tau mautoko i te tapa hāmani ta Toti i patu i ùka o te te matahetū Mataìki, te kite ta īa i kapo mai me i òto o te tau nuina kōtūòmia ta īa i tatau me te tau hakaàvaìa maakau me te tītahi tau hoa me i Aoteaòa.

• No te koìka « Matari’i i ni’a » haììa i Tahiti ma te pō 20 no Âvea

Ua tihe mai Teiki Tetahiotupa me io te pū CODIM no te ape i te maakau o te Haè Tuhuka èo. U hakahua atu te upoko hakatee ma te hakapuàha i te tūìa o Mataìki io tātou i te Henua Ènana nei.   E hakaheeìa te tuhitū io te pū Kātahiìa Mataèinaa o te Henua Ènana.

• Te tatauìa nūmera me te tatauìa moni

U hakatoitoi te tau mautoko i te tekao i patuìa i ùka o te tatauìa nūmera me te tatauìa moni ma te hakamau i te « poho » ma ùka atu o te « tini ».

• E tahi tini : 400 000
• E tahi poho : 4 000 000
• E tahi tini moni : 2 000 000 FCFP (Tatauìa moni : 5F = 1 moni ; 400 000 X 5 = 2 000 000 moni. 4 000 000 X 5 = 20 000 000 moni)
• E tahi poho moni : 20 000 000 FCFP.
  
  

• No te Koìka Matavaa i Ua Huna

U tiàtohu, u koàna mai te haè apuuìa i te tau mautoko e koutee atu no te Matavaa i Ua Huna atii me te pāriri.

• No te kēhuììa i te papature aahi i te Haè Tuhuka

U hakarere te Komanā Hau Henua i te puke hāmani no tēia tumu hana io te Pū te haatumu.

• No te hakamauìa i te nuinareta me te tau taki ma he èo ènana

Eīa te tau taki ma he èo ènana

• Te atu āìaèo (ātinaèo) : A, E, I, O, U
• Te tau mētaki (mētani) : F, H, K, M, N, P, R, T, V (NG, hakahanaìa i teâ ava)
• Te tau taki : te tau mētaki pii me te A.

****** FA, HA, KA, MA, NA, PA, RA, TA, VA (NGA)

• No te ava kaiako a Sandrine Bonnefin

Uap ao te ava kaiako a Sandrine Bonnefin me te tau tuhuka èo o Nuku Hiva. U kātahi īa me te tau tuhuka i te tau putuìa i te pō e toù. Ta īa tumu hana me te kātooìa : te taetae tupuna o te kai tumu. Ua kātoo īa i te nuina ponatekao i ùka o te mei me te kānea i te popoi. 140 ponatekao ta īa i taki mai me io te Kāputuèo Dordillon.

• No te tau kōtūòmia a te Haè Tuhuka èo

E avaiìa tītahi tau kōtūòmia no te hoko io te haè hokoìa haìna Tiki Market a Teiki Gaubil. E vaetukia te mau kōtūòmia hou i te tau haè mataèinaa, te Kōmana hau henua, te Komanā hau nui, i te Èpikopo me te Tūvā.

I te pō 20 no Âvea, Ua putu te tau mautoko io te kaavai henua o Hanaiapa io te haè o Mataohu Félicienne Heitaa.

• No te tau ponatekao tāpapaìa

U hakatoitoiìa te tau ponatekao i pao i te hakaèoìa. U hakaèo i tītahi tau ponatekao hou. Ua pao 165 ponatekao i te hakatoitoiìa me te hakamanaìa.

U hakaēa te putuìa i te pō 21 no Âvea i te hora e 10h00.